Plizyè moun blese nan Jakmèl

Yon moun blese avèk bal, plizyè lòt ak kout wòch, lapolis fè 2 arestasyon...Se bilan setyèm jounen manifestasyon kolektif operasyon pou libere sidès k'ap ekzije KEP-a respekte vòt popilasyon sidès te eksprime an favè kandida senatè KID Dieupie
 
Viktim-lan Jocelyn Jean Gilles 32 lane,resevwa katouch la nan do ki travèse vant li sepandan katouch la pa sòti, daprè medsen chirijyen John Saint Cyr ki tap pran swen viktim-lan nan mitan jounen jedi 27 Out la nan sal ijans Lopital St Michel.
 
Mesye Jean Gilles kise yon chofè taksi te sòti depoze yon pasaje nan ri kreyak e se nan zòn sa li resevwa katouch la daprè eksplikasyon kèk pwòch viktim lan.
 
Jocelyn Jean Gilles pat ka resevwa swen ka li nesesite nan Lopital St Michel akoz aparèy anetsezi lopital la tonbe anpann. Viktim lan transfere nan yon lopital prive nan vil la pou yon entèvansyon chirijikal.
Chef de fil manifestasyon-an Jn Marc Jn Pierre ak Abdias Laurent denonse patizan 2 frè Lambert yo ki daprè yo atake manifestasyon-an ak kout wòch, boutèy epi katouch nan zòn anba lavil, ri St Ann ak Avni Barankiya (sou Granri).
 
An reyaksyon, Kandida Senatè PHTK sidès Joseph Lambert ki prezante tèt li kòm yon viktim kritike konpòtman manifestan yo li di ki desann bandwòl li, dechire foto li toupatou nan vil la. Mesye Lambert pwofite denonse patizan kandida KID-la kap fè vyolans pandan li fè konnen li pral pote plent lajistis pwiske dekrè elektoral la entèdi aksyon sa yo.


Share this post